Ela Pari Huws

Bywgraffiad

Rwy'n cydlynu'r Adolygiad Gwella Ansawdd sydd yn digwydd yn 2026. 

Adolygiad Gwella Ansawdd (Adolygiad GA) yw'r dull mae'r Asiantaeth Sicrhau Ansawdd Addysg Uwch (QAA) yn ei ddefnyddio i adolygu darparwyr addysg uwch yng Nghymru yn rhan o'r Fframwaith Asesu Ansawdd ar gyfer Cymru. Mae'n ddull nodedig o adolygu sefydliadau, a ddatblygwyd i ymdrin â chyd-destun arbennig y sector addysg uwch yng Nghymru. Mae Adolygiad GA yn darparu sicrwydd ansawdd ac yn cefnogi gwella ansawdd, gan sicrhau cyrff llywodraethu, myfyrwyr a’r cyhoedd yn ehangach bod darparwyr yn bodloni gofynion Medr, Y Comisiwn Addysg Drydyddol ac Ymchwil. Mae Adolygiad GA yn asesu darparwyr yn erbyn gofynion sylfaenol y cytunwyd arnynt a'r Safonau a Chanllawiau Ewropeaidd (ESG).

Ymunais â Phrifysgol Caerdydd fel Swyddog Digwyddiadau a Chyfathrebu ym mis Ionawr 2024, gan weithio fel rhan o'r tîm Cyfathrebu Mewnol. Yn y rôl hon, roeddwn yn arwain ar gynlluniau cyfathrebu'r Academi Dysgu ac Addysgu, yn cydlynu cyfathrebu mewnol yn ymwneud â'r Gymraeg, a'n cefnogi cyfathrebu prosiectau trawsnewid gan gynnwys Dysgu Hyblyg Gydol Oes a'r Cynllun Cynefin.

Astudiais ym Mhrifysgol St Andrews yn yr Alban rhwng 2015 a 2019, gan raddio â gradd MA (Honours) mewn Anthropoleg Gymdeithasol. Ar ôl graddio, treuliais bedair blynedd yn gweithio fel Cydlynydd Cyfathrebu a Chreadigol ar gyfer Llenyddiaeth Cymru, y cwmni cenedlaethol â'r cyfrifoldeb dros ddatblygu llenyddiaeth. Roeddwn i'n gyfrifol am brosiectau amrywiol, gan gynnwys Bardd Plant Cymru a Gwobr Llyfr y Flwyddyn.